स्नान र दीपदान गरी आज नरक चतुर्दशी पर्व मनाइँदै

१८ कात्तिक, काठमाडौं । कुकुर तिहार बुधबार नै मनाइए पनि नरक चतुर्दशी भने आज मनाइँदै छ ।

कुकुर तिहार र नरक चतुर्दशी यमपञ्चक अर्थात् तिहारको दोस्रो दिन पर्ने भए पनि यस वर्ष तिथिको घटबढका कारण कुकुर तिहार दोस्रो दिन बुधबार र नरक चतुर्दशी तेस्रो दिन आज परेको समितिका अध्यक्ष प्रा. श्रीकृष्ण अधिकारीले बताए ।

प्रत्येक वर्ष कार्तिक कृष्ण चतुर्दशीको बिहान अरुणोदयकालअघि नदी, तलाउ वा धारामा गई स्नान गरी नरक चतुर्दशी पर्व मनाइँदैछ ।

स्नानपछि सालको पातमा यमदीप दक्षिण दिशामा फर्काई बालेर बगाउने कार्य गरिन्छ । यसलाई नरक स्नान गर्ने र नरक बगाउने भनिन्छ । आज यसो गरिएमा नरकको दर्शन गर्नु नपर्ने शास्त्रीय मान्यता रहेको धर्मशास्त्रविद् एवं नेपाल पञ्चांग निर्णायक समितिका पूर्वअध्यक्ष प्रा. डा. रामचन्द्र गौतमले जानकारी दिए ।

यस वर्ष कात्तिक १६ गते मंगलबारदेखि यमपञ्चकअर्थात् तिहार पर्व सुरु भएको हो । दोस्रो दिन बुधबार काग र कुकुर तिहार पर्व मनाइएको थियो ।

from समाचार – Online Khabar https://ift.tt/2ZUq0pz